Amenázorõ pyhare
Che ranchoguýpe aguapy
Ajapysaka mombyry
Ahendu heta mba'e

Pytû ha overa mante
Ha hayvi tykytyky
Arasunu yvyguy
Poniéntegotyo ahendu
Ho'áma ave yvytu
Hyapupa karanda'yty

De tanto pe akyhyje
Tuicháma ajatapy
Jepe'áma ambyaty
Aravai pukukue

Ahendúma ave aguîete
Jaguarete o-roncá
Ka'aguy omboryryipa
Ha o-repuntá topehýi
Ha umi guasu oñemondýi
Javoráire odispará

Guahotýpe apete
Oikóma la ngururu
Iñangekói kuriju
Vaka ra'y omyasê

Ha barrérope kure
Ahendu iñangu'apu
Umíva ta'ytetû
Osêva tujupaguépe
Pe amo maciega yvatépe
Hasê aguara guasu

Bandada tañykatî
O-seguí upe carretera
Táky táky pe hãikuéra
Rehendúma oñuguaitî

Hetakuérehe ohuã'i
Piritýpe ojahu
Ombochochóka tuju
Hendupyrãko oî
Ju'i, kururu chini
Ykuakuépe ahendu

Osapukáima león
Mála nóchepe oguata
Túky túky che py'a
Aimo'ã mala visión

Ha oseguí upe cañadón
Imanádape obicheá
Icarnadarã oheka
Pe amo rodeo jerére
Ha ohasávo ñumbytépe
Ombo-bujá mburika

Vecínope ahendu
Umi jagua ogua'i
Omuña aguara'i
Ogueraha ryguasu

Ka'aguýre osununu
Oñemondýi mborevi
Yvyra máta ojapi
Apa'a ojapyhara
Ha yvate ombojupipa
Onza jaguarete'i

Riáchope jakare
Oime ocachiporrea
Huguái ochicoteá
Omomorã pyhare

Jaguarundi, lobo pe
Uperupi oñomuña
Akuti ave o-retozá
Cazal oñombojaru
Ha upépe avei ahendu
Ijojói kapi'yva

Picádare mombyry
Carrero osapukái
Takuruty ndohasái
Añámante oguerojy

Hi'urukuéra ipochy
Ahendu látigo pu
Cuarta ndaipu'akái
Tape ipo'i, ndovavái
Tróncore ojejoso
Guéi poriahu ojeja'o
Carrero loco ombohái

Hi'ãguivo ko'êmba
Pe amo cérrope ayvu
Serenátape ahendu
Opurahéi karaja

Ha ka'i mirikina
Oasegundá ichupe
Omiãu aguara pope
Ho'y'ỹi umi kuati
Chuzatýre opiriri
Ko'êmba porã mboyve